目擊者帶兩友查證嚇餐飽
【本報訊】「可能係公仔啫！」率先發現半裸女死屍的西餅師傅張先生，一度懷疑是吹氣公仔，返回葵涌麗瑤邨後與兩好友談及此事，友人認為事態嚴重，但又怕虛報案件浪費警力，三人於是帶備香燭重返現場尋屍，證實是女屍後，三人雖感驚慌和不安，但希望女死者可以沉冤得雪，將兇手繩之於法。
兩名分別姓鍾及姓陳的好友，從張師傅口中得悉發現女裸屍，兩人均感可疑，「嗰度點會有公仔呀？好可疑！」由於擔心未查明事件報假案，三人於是結伴返回現場尋屍。
三人抵達現場時，鍾顯得頗緊張，「我估唔似公仔，如果個女仔真係被姦殺，希望幫到佢唔使再日曬雨淋。」但他又坦言心驚驚，「我哋準備好晒o架啦，帶咗嘢去燒畀佢」，相反張非常冷靜，「我估都係公仔多」。
帶備香燭「燒嘢畀你先」
鍾與陳即拿出一早準備的香燭冥鏹，隔着鐵絲網發現疑似女屍時，二人嚇得大叫，「係啦！係啦！九成係啦！」並即時燃點香燭、大灑溪錢，「我哋係嚟幫你，唔係搞你，依家燒嘢畀你先！」他們邊化寶邊致電報警。
事後鍾坦言雖感害怕，但覺心安理得，「本來都係估一半一半，依家證實係真，都叫做幫到個女人將件事揭發出來，如果真係有壞人害佢，希望警方可以早日將兇徒繩之於法，個女人可以早日入土為安！」