中環出更：施榮懷過大海發新年財
各大商會輪流恭喜發財，尋日輪到廠商會。新會長施榮懷（Irons）上任後首次大派利是，派到無停手。新正頭，大家都開懷無所不談，講到農曆新年外遊，好多高層都驛馬星動，除Irons遊濠江兼大發新年財外，升呢做永遠名譽會長嘅黃友嘉（David）都飛咗去土耳其，飽覽名勝古蹟，亦食飽風雪。
廠商會尋日喺其中環大本營搞團拜，人氣旺爆，好墟冚。副會長陳淑玲、李秀恒、吳永嘉、徐炳光、吳清煥齊撐場；常董黃家和（Simon）、李慧芬、會董盧金榮及蔡志婷都嚟湊熱鬧。Irons就以「摩打手」派利是，表現風騷，原來佢新年喺澳門賭場發咗兩千元新年財，金額唔算多，但勝在好意頭。Irons過年前還一時不慎仆倒飛甩眼鏡，龍年一到就轉運，可喜可賀。
卸下會長重責嘅David，早前同太太及千金詩岸同遊土耳其，點知遇上落雪兼刮大風，David帶唔夠衫，冷到騰騰震，大殺風景。土耳其盛產新鮮無花果，佢臨走前狂掃貨，總算不枉此行。
Simon都有出門到日本公幹，到訪九州、鹿兒島及宮崎等地，搜羅優質和牛。Simon話，日本商人喺大地震後，積極尋商機，見到香港商家不知幾開心，所以講價話咁易，佢趁機尋求更多和牛貨源。買貨前，梗係要試真啲，Simon於是變身試食專家，一日五餐和牛宴，爽到極。
吳永嘉北上省廠商招牌
講番廠商會，龍年經濟嚴峻，廠佬、商家預咗風光不再，接棒做廠商會展覽服務有限公司主席嘅吳永嘉就帶隊北上為工展會省招牌，四月首站係武漢，六月進軍廣州，年尾再出擊福建，展覽規模唔嘢小，務求帶港商殺出一條新財路。
卓妮