中環出更：董太翡翠鑽戒質優罕有
做翡翠珠寶生意嘅福建社團聯會副主席董吳玲玲，經常佩戴自家設計嘅靚翡翠，令人眼前一亮。卓妮日前喺福建社團新春酒會上，見到董太打扮靚靚，上身着住購自上海、色澤繽紛嘅靚衫，指間就戴住一枚設計簡約嘅翡翠鑽戒，將佢襯托得貴氣耀眼。
自家設計 價值非凡
講起價值非凡嘅翡翠戒指，董太就好開心，事關戒指係自家設計，佢盛讚翡翠嘅種質好靚，好難搵到，所以特別喺指環兩邊鑲上南非鑽石，一來可以好好保護翡翠，二來整體設計令到予人穩重感覺嘅翡翠更顯年輕、乾淨。佢仲教路話，為咗突出翡翠嘅主角地位，翡翠兩邊一定要揀選細粒嘅鑽石。
過完喜氣洋洋嘅農曆新年，董太又要專注生意業務及香港晉江同鄉會會長嘅工作，佢希望拉近其家鄉晉江與香港距離，促進兩地年輕人交流。