中環出更：浙聯青委私竇嘗家鄉菜
最近有好多中環政商名人出沒灣仔駱克道僑阜商業大廈，事關由浙江省同鄉聯合會（浙聯）開設嘅「浙江軒」餐廳，開業不足三個月，但精彩美味嘅淮揚佳餚聲名不脛而走。卓妮早前相約浙聯一班青年委員去食晏試菜，期間巧遇莊士集團主席莊紹綏夫婦及囝囝莊家彬等人喺度食飯，佢哋係福建人都咁捧場，可見餐廳出品唔簡單。
當日浙聯青年委員會主席車弘健（Anthony）聯同常務副主席麥超傑、鄒漢章，副主席李本俊、楊靈以及秘書長單曉斌，一班年輕人一邊享受地道家鄉菜，一邊密謀連串嘅新年新計劃，包括每個月舉辦一次名人講座。
Anthony係浙聯前會長車越喬之子，李本俊就係代理Sharp品牌嘅聲寶－樂聲（香港）創辦人李達三嘅孫仔，現已接班出任公司主席，而單曉斌爸爸係時代裘皮動物董事總經理單志明，浙江幫老中青三代承傳有方，認真難得。當日佢哋叫咗成枱美食，包括勁受食客歡迎嘅醬蘿蔔、熏魚、胡椒小酥餅及松子雞粒鍋巴卷等，眾人食得好盡興。
25股東出資開會所餐廳
講起新簇簇嘅會所及餐廳，Anthony話，新會所係由廿五位股東出資購置，共有三層，其中兩層係餐廳。鑑於餐廳生意太好，所以最近又買咗同棟大廈六樓半層，打算擴充營業。餐廳布置雅致，處處顯心思，原來幕後功臣係Anthony及已故「船王」包玉剛之女包陪慶，兩人一手一腳砌出夢中嘅會所餐廳，難怪受歡迎程度跨越省籍界限。