政情：阿Paul出「年報」補飛
政圈一直傳緊旅遊界立法會議員謝偉俊（Paul），會喺九月立法會選舉轉戰九龍東直選，聽講仲同建制派傾掂晒數添。正當傳聞傳來傳去之際，我哋尋日就收到阿Paul最新嘅工作報告，封面寫住「發展九龍東商業旅遊新核心」，除咗講旅遊之外，仲講埋九龍東發展，佢出選九龍東嘅意圖已呼之欲出。
雖然阿Paul嘅目標昭然若揭，但佢已經好耐冇出工作報告，忽然整份「年報」出來，乜嘢事先？佢就喺報告序言認衰，話距離上次出報告已經有好一段時間，雖然佢都有更新個人網頁去交代議會工作，但亦知道唔少選民仍然依靠呢份印刷報告去衡量佢嘅工作表現，所以希望亡羊補牢，出番份報告交代工作喎。
到底阿Paul幾耐冇出印刷版工作報告？佢冇刻意交代，但從報告上列出佢參加過較具規模嘅活動嚟睇，估計都有超過年半冇出過報告喇，所以佢呢份工作報告稱得上係「年報」。