政情：工聯壓工黨靠工時立法
為爭取打工仔選民支持嘅勞工政團，過去一直鬥到死去活來，好似最近由一眾政治雜牌軍組成嘅新工黨，就成為「老牌工會」工聯會嘅假想敵，要頻頻諗計迎戰，前日仲突然走出嚟「要脅」特首參選人就標準工時立法進一步表態，先會考慮提名佢哋，忽然搞到咁兇狠，原來背後另有別情。
屬於建制派嘅工聯會，一向打住「撐勞工，為基層」口號，過往同泛民主派工會競爭激烈。由於勞工議題來來去去都不外乎嗰幾樣，雙方都冇反對空間，所以邊個爭到議題嘅主導權，邊個就可以手執籌碼，喺選舉中將對方打到落荒而逃。工聯會今次主打「標準工時」，目的都係咁，用以迎戰新工黨。
消息人士話，決心全面打住自己牌頭參加直選嘅工聯會，喺去年區議會選舉初嘗甜頭後，對參加九月立法會選舉嘅決心更加堅定。為咗打響頭炮，副會長「票后」陳婉嫻參選超級區議會時得票一定要夠高，所以佢哋先會諗出所謂嘅「風車戰陣」，由嫻姐帶領其餘全港五大區候選人一齊出戰，希望全取六席，雄心壯志。
唔成事亦冇蝕底
工聯會內部鎖定工黨為主要競爭目標，希望喺勞工同基層議題上爭奪到輿論同宣傳嘅主導權，所以前日先會公開向特首參選人喊話，希望爭到參選人答應當選後就標準工時立法，成事嘅話，工聯會履歷表上又多一個「成功爭取」項目，即使最後唔成事，亦冇蝕底，至少已經爭到曝光機會。
有工聯會中人話，佢哋以往選舉都係為他人抬轎居多，今次首度全面參選立法會，領導層壓力其實相當沉重，更加可以話係不成功、便成仁，故此每行一步都要諗過度過，寧願原地踏步，都唔想行差踏錯。講到咁認真，大家即管放長雙眼，睇吓工聯會下一步棋點行喇！