中環出更：朱繼陶牛一 八達通自動升呢
名人住豪宅享有好多住客服務，但估唔到連八達通卡都包括在內。話說本月十五日星期日係太子珠寶鐘錶執董朱繼陶（Joseph）嘅六十五歲生日，佢如常由中環搭港鐵返去位於西九龍嘅豪宅，但出閘「嘟」八達通時就發覺只係扣咗四元一角，只係正常票價嘅一半，於是再睇清楚確定自己有冇眼花，結果真係收咗半價，心諗會有咁着數？
即時獲長者優惠
後來Joseph左諗右諗，幾經追查後才發現自己張八達通兼備豪宅住客證嘅功能，其個人資料亦藏於卡內，咁啱當日佢足六十五歲夠資格申請長者卡，電腦系統就自動提供長者半價優惠。換言之，Joseph今次慶祝生日，佢嘅成人八達通亦隨之「升呢」為長者八達通。Joseph話，估唔到唔使申請長者卡，就自動享有長者優惠，所以話科技嘅發展令生活更便捷，值得一讚。
至於今個農曆新年，Joseph話冇外遊，事關自小受到「父母在，不遠遊」嘅傳統觀念影響，所以過時過節絕少出門遠行，但佢交遊廣闊，新春節目早已排到密麻麻，絕對唔怕悶親喎。