中環出更：郭詩慧BB未出世先討利是
沙田凍到得攝氏六度，但初三賀歲馬照樣旺爆。城中名人爭入沙田馬場發個新年財。莎莎太子女郭詩慧（Melody）同老公陳振邦（Davis）齊入場，見到Melody腹大便便，原來佢仲有兩個月就要產子。「小龍B」未出世，已吸引世叔伯畀利是。
Melody嘅愛駒「綻放美麗」尋日出戰第二場，佢與好友齊入場打氣，可惜無緣拉頭馬。Melody得天獨厚，懷孕期間長胎唔肥人，無他，秘訣係照樣返工搏殺。
發叔捧賀年盃贏百萬元
Melody仲話，未必放足「前四後六假」，做嘢要緊。老公Davis好體貼，請定陪月員。
數全日最lucky，非鄉議局主席劉皇發莫屬。發叔匹團體馬「精彩日子」喺第十場大發神威，臨尾發力衝上捧走「賀年盃」，佢同囝囝劉業強即時笑晒，獎金高逾一百萬元，呢封賀年大利是，認真和味。