政情：神童畫煲呔曾 似苦瓜乾
農曆新年將至，煲呔曾過往每年都會絞盡腦汁拍攝賀年短片救民望，今年就搵嚟獲獎無數嘅神童畫家劉見之幫手畫畫同參與拍攝，點知年僅六歲嘅見之「童畫無忌」、「童叟無欺」，送咗幅畫到煲呔曾成個苦瓜乾面口嘅畫像畀佢。連小朋友都睇得出煲呔曾撐得咁辛苦，不如早啲「退伍」喇！相信好多市民都會拍爛手掌表示支持。
特首辦尋日喺社交網站上載咗煲呔曾為農曆新年拍攝嘅相片，最注目嘅係煲呔曾收到見之送嘅肖像畫，因為畫中煲呔曾目如死魚、面無血色、兩頰凹陷、仲露晒成崩削牙出嚟，似笑非笑咁相當嚇人。
有人見畫後大讚見之嘅畫工真係形神俱在，充分展現煲呔曾嘅真性情同內心世界，亦反映咗唔少市民心聲同對煲呔曾嘅認識。但亦有留意開見之作品嘅人話，其實呢個係佢嘅一貫畫工，毋須過分解讀喎。