相信唔少人都密鑼緊鼓籌備起程，利用一連幾日農曆新年假期外遊。原來經濟動力立法會議員梁君彥（Andrew）同林健鋒（Jeffrey）都準備外遊，Andrew尋晚就同家人啟程飛去中東杜拜玩一星期，主要係打高爾夫球，佢話貪當地嘅天氣好喎。至於Jeffrey今日就會同太太及囝囝去泰國曼谷玩五日，享受陽光與海灘，過一個熱辣辣嘅假期。
候任新界總商會主席齊光華嚟緊都會同太太去日本玩幾日，佢話唔怕輻射，仲話年前日本地震後一星期，佢已經飛去日本視察災情，仲捐錢畀當地紅十字會添。佢同日本有唔少生意往來，今次過去都係以公幹為主，但就會抽時間度假鬆一鬆。有人鍾意去熱帶度假，但海皇粥店老闆蕭楚基夫婦初六起程飛去韓國濟州，希望度過一個白雪雪嘅農曆新年。