政情：霍泰輝罰抄書 禍及家人
喺五十年代開辦，依家已經結咗業嘅東院道官立小學，原來出過唔少名人校友，最近佢哋仲出咗本書紀念母校，名為《我們來自東院道官小》，大爆名人校友那些年往事。其中現任中大醫學院院長霍泰輝就自爆讀小學時好百厭，試過作狀踢老師屁股但當場被發現，被罰抄學生守則五十次，翌日就要交貨，最後要全家總動員通宵幫手先至抄得晒。
做過立法會議員嘅校友胡經昌仲搞笑，話有次與同學玩兵捉賊扭傷足踝，佢忍住劇痛跛吓跛吓都要繼續玩，之後又失足撞咗落籃球架，竟然將扭傷咗嘅踝骨撞番正！
另一校友港區人大代表馬豪輝憶述，佢細個好窮，家住「劏房」，每日返學經過當年仲係起緊嘅豪宅「豪園」，形同天國與地獄。後來佢做咗律師有能力住豪宅，就二話不說購入「豪園」，一償兒時心願。