政情：唐唐抄CY舊橋 弄巧反拙
兩名特首參選人梁振英（CY）同唐英年不時隔空鬥法，CY早前使出奇招「路過」民建聯（民記）活動，贏晒宣傳，點知唐唐又抄橋，尋日下午連同一家大細「路過」民記黃大仙年宵攤檔爭取支持。不過，唐唐到場後竟然冇第一時間同民記打招呼，疑似激親民記多名地區人士，難怪事後有人心中有氣，質疑唐唐點解「路過」都唔可以光明正大探望佢哋喎。
唐唐行到最後先至到達民記攤檔，當佢參與玩拿糖遊戲時，有民記中人就玩佢話：「好似攞選委票咁就得㗎喇！」不過，任佢攞都只係攞得好少糖。
至於CY尋日就先到灣仔出席最後一場政綱諮詢會，下午再拖埋太太唐青儀逛維園花市，使咗千幾蚊，包括買咗以「神獸卡」為藍本嘅「量鷹」文件夾。其後CY行經民主黨嘅攤檔時，有白鴿黨中人立即送上「豬狼共舞」、「民主必勝」揮春，佢好大方咁叫公關收咗。離開維園前，CY經過籃球場一時技癢，執起個籃球跳射。
雙英子女：豬不蠢 唔覺狼
唔知大家有冇留意，CY同唐唐嘅家人近日分別接受電子傳媒訪問，尋日輪到佢哋嘅仔女。對於唐唐被外界形容為豬，唐唐長子唐嘉盛大讚話，唐唐喺佢心目中係個好爸爸，又話豬唔係蠢嘅，因為《動物農莊》嘅豬係最聰明。CY嘅孻女梁頌昕就話，當聽到有人用狼嚟形容爸爸時感到驚訝，因為問心根本唔覺，CY嘅長子梁傳昕亦話爸爸係能幹同做嘢嘅人，畀人冷漠嘅外表只係反映佢認真喎。