政情：嫻姐當黑 難再膺票后
尋日我哋講過，龍年立春八字對香港同夕陽高官運勢嘅啟示，今日就輪到立法會議員嘅龍年運程。龍年特別之處，就係九月立法會選舉多咗超級區議會議席，預料各黨明星盡出，但究竟如意算盤係咪打得響呢？我哋繼續搵來香港術數家協會術數師楊子東，批算議員出生八字中嘅年、月、日三柱，分析箇中玄機。
一眾政壇老手中，先講工聯會副會長、「票后」陳婉嫻。一般相信，嫻姐選超級區會議席有贏冇輸，只係能否再次登上「票后」寶座。不過，楊師傅坦言，嫻姐龍年「流年不利，凡事不順」：「雖然唔知嫻姐出生時辰，唔可以好準計到，只不過雖不中亦不遠矣。」楊師傅提醒，嫻姐立秋後運程最差，選舉好多變數喎。
劉江華「渾水摸魚」
第一個分析已經咁驚嚇，咁其他又點呢？另一個聽聞會選超級區會嘅立法會議員劉江華，早前順利當選沙田區議員，取得參選超級區會議席入場券，楊師傅就贈咗佢八個字：「渾水摸魚，仍可順利」。咁奇怪？渾水摸魚係乜嘢意思呢？楊師傅笑笑口話，呢個留待大家自行揣摩，但最緊要係劉江華參選會順順利利，咁講法，即係有機會高票過嫻姐做票王啦！
講完兩位建制派巨頭，跟住講吓可能參選超級區會嘅民主黨主席何俊仁（鐵頭仁）。楊師傅話，鐵頭仁龍年「流年不利，春冬較差」，即係話年頭年尾鐵頭仁嘅運勢都麻麻地，意味無論選特首或選立法會都遇阻滯。楊師傅補充，六十歲嘅鐵頭仁，八字好旺，但就因為太旺，出現物極必反嘅現象，快則正月已經有可能出問題。
梁國雄「仍可牙擦」
至於代表激進民主勢力嘅社民連，兔年可謂相當動盪，盛傳會接任黨主席嘅「長毛」梁國雄，龍年運勢就唔錯，楊師傅話佢今年「流年有利，仍可牙擦」，相信喺新界東連任冇問題，就連前主席陶君行全年運勢都唔錯，秋天仲旺，唔通陶君行可以為社民連喺九龍東再下一城？
除咗佢哋兩個，去年下旬喜獲麟兒嘅議員涂謹申都運勢平穩，入秋後更係漸入佳境，真係恭喜晒。不過，運程呢家嘢都係信則有，不信則無。