中環出更：陳國民拉頭馬 開心指數爆燈
送兔迎龍，尋日沙田馬場舉行兔年最後一日賽事，好多政商界名人都有入場湊熱鬧，其中「廚房大佬」德國寶董事長陳國民好開心，事關其愛駒「開心指數」奪冠，穩袋三十八萬幾獎金過肥年。陳國民聯同廠商會會長施榮懷（Irons）、中小企業商會會長吳宏斌、工業總會主席鍾志平、莎莎老闆郭少明等幾個老友高高興興拉頭馬。
講起「開心指數」呢個得意馬名，原來陳國民用咗佢同班老友一齊搞嘅「提升快樂指數基金」組織名稱概念而命名。佢話，前年有調查話港人快樂指數低，於是同老友成立咗呢個基金組織，搞吓講座、烹飪班、唱歌班，幫企業老闆增加快樂，唔好只顧住搵錢，所以佢嚟緊會同太太及囡囡去日本東京、大阪玩八日，度假叉吓電，兼享受家庭樂。
尋日廠商會團體馬「創出商機」亦首次出賽，Irons同太太及爸爸施子清伉儷專程到場為愛駒打氣，但未能跑出。講到新年願望，Irons希望大家對中港兩地經濟唔好咁悲觀，事關危中有機，話唔定新一年會有轉機。
施家過大海享天倫
原來施家有個傳統，每逢大時節就會成家出外旅遊，因為平時幾兄弟分開住，聚少離多，所以趁有假期就會一齊飲飲食食。未來幾日，施家上下會去澳門銀河度假三日。至於郭少明就做廿四孝爸爸，會同太太、細女去英國探望讀緊書嘅囝囝同老友，抖足一星期先返港。
卓妮