政情：劉詩韻膺測量師一姐
成立已經廿八年嘅香港測量師學會最近換屆，呢個一向被視為男士作主導嘅行業今年選咗一位女會長，成為創會以來首位女揸fit人，呢位女中豪傑坦言今年面對強制驗樓、僭建等問題，相信工作會務兩邊都會好忙，所以已經同老公同個女報定案，有信心可全身投入會務。
曾經任產業測量組主席嘅劉詩韻獲選今屆會長，佢話今年正值政府推出強制驗樓等新措施，加上新界丁屋僭建問題仍未解決，相信嚟緊有排忙，對於僭建問題，佢強調要尊重法律，「有法一定要守，但係咪可以釋法或者修改法例去配合現況？相信係一個政治議題多於專業問題，特首候選人要好好考慮。」
手執十八選委票嘅測量師學會將聯同建築師學會等幾個業界下月初會見三位特首參選人。有會員透露，日前唐英年嘅「所謂僭建」論辣㷫咗唔少會員，批評佢同發展局政策對着幹，估計會面當日唐唐將會受到唔少質詢。