民主黨馮煒光聲稱畀人民力量黃毓民襲擊呢場鬧劇又有新發展。民主黨尋日召開記者會，話總共有三位目擊者見到毓民對馮煒光揮拳相向，當中包括中常委李永成、殷永生等人。佢哋一行六人之後仲走咗去旺角警署報案，警方同佢哋講話呢啲屬於跨境罪案，要交畀CID處理。
李永成話親眼見到毓民隻手由上到下咁揮向馮煒光，打中佢嘅鼻樑位置。民主黨副主席單仲偕話今日會同台灣駐港經濟文化辦事處見面，希望可以攞到事發時嘅錄影帶，而馮煒光喺今個禮拜內會向立法會投訴毓民。民主黨立法會議員黃成智仲話，如果毓民仲係死口話自己無做過嘅話，就應該交出案發時人民力量義工拍下嘅錄影帶，還自己一個清白。
馮煒光之前話自己已經向台灣警方備案同驗傷，但本報記者問過八德派出所職員，佢話當局只係幫咗馮煒光備案，案件尚未進入司法程序。國民黨總部保安人員亦都話，基於個人資料保護法嘅規定，未必可以將餅錄影帶交畀民主黨。
毓民就回應話，件事唔喺香港發生，報警係浪費警力，因為香港警察根本無權查。人民力量尋晚亦都去咗報警，指馮煒光浪費警力。對於《蘋果日報》聽信一面之詞，係要講毓民有打馮煒光，自稱癲狗嘅毓民話，佢今日就會開記者會，公布計劃去燒《蘋果》，總之「日日燒蘋果，無人呃到我」！