政情：夕陽政府 3‧25淪跛腳鴨
特首選舉三月廿五日投票，候任特首辦於下任特首當選後正式投入運作，以便喺七月一日宣誓上任前，可以着手籌組新一任政府，同時可以同現任政府做好交接。不過，有議員擔心候任特首辦會變相成為另一個權力核心，特首辦主任梁卓偉就話，特首辦會做兩屆政府嘅「交匯點」，令兩屆政府可以順利交接，有良好溝通，確保唔會發生「政策急轉彎」嘅情況。不過呢，其實煲呔曾之前都講過新任特首選出後，除非有必要急切性，否則都唔會推出新政策，睇嚟未有另一權力核心冒起之前，煲呔曾已經自己揼跛夕陽政府。
候任特首辦將會喺下屆特首選出後，運作約三個多月，政制及內地事務局局長譚志源尋日喺立法會政制事務委員會強調，新一屆特首一日未宣誓，一日都無實權，而成立候任特首辦只係為方便交接工作，候任特首出席公開活動嘅開支就會喺已預留大約八十九萬元嘅其他部門一般開支中支付。
政府建議嘅候任特首辦一共有廿六人，主管由相當於局長級嘅官員出任，對落仲有一個D6同埋D4級政務官擔任候任特首秘書長同埋候任長官私人秘書，政府初步構想，如果新任特首同意，呢兩個人喺特首正式上任後，可以過檔去特首辦，繼續做特首秘書長同私人秘書。
公務員調配引發角色衝突
呢班候任特首辦人員中，除咗主管及特別助理外，其他全屬由其他部門調配嘅公務員職位，即刻惹起多個議員擔心會引起角色衝突。梁卓偉就話，公務員內部調配平時都做開，所以問題應該唔會太大。
雖然有改變係好事，但難保新任政府上任後，會令香港淪入兩個權力核心嘅狀態，而財政預算更係橫跨兩屆政府，要新一屆政府「硬食」亦並唔公平。梁卓偉就話，會做好「交匯點」角色，如果發現新一屆政府理念有非常尖銳嘅不同，現屆政府會按緩急先後作出協調。
其實煲呔曾都已經收咗工好耐，翹埋手都唔使點做，早已經自廢武功，三二五之後，佢就可以日日喺夕陽之下攞佢個跛腳鴨金獎出嚟抹吓睇吓，唔使做都有糧出，幾好呀。