中環出更：黃楚標嫌悶 拒郵輪假期
坐郵輪即係歎世界喇。不過全國政協委員黃楚標試過一趟郵輪旅程之後，就話唔想有第二次喎。
不好博彩愛高球
本身擁有幾架私人飛機嘅黃楚標抗拒坐郵輪，並唔係畀協和號嘅海難所嚇怕，皆因佢認為現今科技先進，今次意外應是人為疏忽所致。而對郵輪卻步嘅真正原因，係一個悶字。標哥話自己唯一一次郵輪假期，係多年前陪家人喺意大利參加為時六日嘅海上之旅。雖然船上有唔少博彩及娛樂設施，然而自己並非好此道者，結果整日困守船艙，悶到發慌，加上標哥酷愛高爾夫球，在船上遇着技癢之時，卻無法一展身手，真係好唔安樂，可想而知嗰次嘅海上旅程係幾咁難捱。故此經過呢次嘅體驗，標哥對於郵輪假期都耍手擰頭。
至於嚟緊嘅農曆新年，標哥就選擇咗泰國蘇梅島呢個老幼咸宜嘅度假勝地，同親友一齊過一個暖笠笠假期，而前往當地嘅交通工具，唔使諗梗係私人飛機啦。
卓妮