中環出更：盧振雄拍拖行街消磨時光
前消防處長盧振雄退咗休三個幾月，日子過得好休閒。上星期二下午，卓妮見到佢相約太太拍拖行孖咇，兩人先喺ifc商場嘅超級市場City'super慢行細看，跟住再去德輔道中嘅永安百貨睇過，但結果空手而回，就咁消磨咗成個下午。
逛超市百貨公司冇斬獲
當日下午約三點，盧振雄一個人喺ifc現身，冇耐太太同佢會合後，兩人就入咗City'super，但只係消磨咗十五分鐘就空手而回。
跟住兩人十指緊扣，施施然行去永安百貨。入到去永安，兩人就兵分兩路，太太喺地下睇女裝，盧振雄就直上三樓男裝部，期間被一件半價後售價六百二十五元嘅外套吸引，仲急電老婆上嚟幫吓眼，但結果都係冇買到。早前佢同卓妮講過，正同政府申請做義工。連做義工都要申請，只有同愛妻行街，唔使申請。
卓妮