政情：癲狗咬《蘋果》斥違傳媒操守

十幾個人民力量支持者尋日一早到機場等毓民，佢哋仲帶埋兩大紮花，又拎住寫上「支持毓民、信你清白」嘅橫額，毓民一出機埸見到呢個場面非常興奮。之後傳媒當然想知今次風波真相係點，毓民本來唔想講，但又忍唔住條氣，話有傳媒將馮煒光張相加工，搞到好似被人打咁。

毓民話呢種風氣唔要得，唔可以憑一面之詞，就話佢有打人，因為現時無人有證據可以證明佢有打馮煒光。「佢想出名，咪由佢囉！如果我有犯事，台灣會畀我走咩？」毓民最後話，現時唔會回應住，明日先交代所有事。據講，人民力量年初二更會到壹傳媒大樓外抗議，以示不滿。《蘋果日報》尋日刊登一段聲明，鄭重聲明馮煒光張相無經過特別處理，仲話對人民力量罔顧事實嘅指摘，保留法律追究權利咁話。