好多成功名人都講過，讀大學最主要唔係學讀書，而係學做人，所以參加課外活動唔少得。好似工商專業聯盟召集人林健鋒（Jeffery）咁，佢就話自己喺美國讀大學嗰陣，係第一個創立中國同學會嘅學生，希望靠呢個會聯繫校內華人學生感情，不過佢好誠實自爆，其實同學會嘅「學術」性唔高，反而係識女仔為主囉。
Jeffery尋日喺電台節目上講那些年，佢話爸爸好有遠見，一早安排佢讀完中學後，就遠赴美國升學，令佢見識到外面嘅世界。佢喺美國波士頓Tufts University讀機械工程時，就一手成立中國同學會。
佢好老實講，其實同學會呢個平台，學術成分好低，反而好方便佢識女仔，大家溝通吓就自然熟落。佢仲話波士頓近海，海產好豐富，所以成日開蠔同煮靚海鮮畀女同學食，練得一手好工夫，唔知林太又有無試過Jeffery嘅手勢呢？