政情：經綸慈善基金 四千萬捐八大
特首選戰開始入直路，不過政界一路盛傳，中央除咗梁振英同唐英年兩位人選外，仲喺度了解緊有冇第三個可能人選。其中一個傳足幾年嘅可能人選，就係利豐主席馮國經。佢出任主席嘅經綸慈善基金尋日宣布，撥款四千萬港元，喺香港八大院校設立利豐服務領導計劃。
為咗慶祝自己間公司利豐成立一百零五周年，馮國經透過呢個基金作出大筆捐獻，呢個新計劃係由經綸慈善基金同香港服務領導與管理學院合辦，透過呢個管理學院同八大院校締結夥伴關係，以加強香港培育服務領袖嘅策略性計劃。
馮國經話，香港本地生產總值九成來自服務業，如果要喺全球化下維持競爭力，香港必須維持服務業裏面嘅領導能力，呢個計劃可以提供良好嘅學習框架同實踐經驗，加上喺國家「十二．五」規劃下，香港亦以服務業為重點喎。馮國經忽然有動作，究竟同特首選舉有冇關呢？