政情：潘潔邱誠武係咁先

煲呔曾○八年五月自創副局長制度，委任八名副局長加入問責團隊，事隔一年多後又再委任兩名副局長加盟，合共十名副局長喺六月三十日後有冇得留低，某程度上反映副局長制度嘅成敗問題。

我哋綜合政界各方消息，至少有一半曾經出任副局長嘅問責官員有得留低，其中政制及內地事務局嘅譚志源、商務及經濟發展局嘅蘇錦樑喺煲呔曾出手下提早上位做局長，梁卓偉更變身「大內總管」成為特首辦主任。至於黎棟國同陳維安，由於直屬局長李少光同孫明揚分別因年紀較大同患有腎衰竭「退伍」機會高唱入雲，所以如無意外，黎、陳兩人好大機會留任。其中又以陳維安情況較複雜，因為喺任期將盡前，先至被揭發佢專責嘅教科書同教材分拆，一事無成。

許曉暉梁鳳儀要「轉型」

政府換屆當前，有人留低自然亦有人被叮走，潘潔同邱誠武獲委任為副局逾三年半幾乎未做過一齣好戲，前者對環保政策唔熟悉，後者亦未能及早掌握持份者同市民對交通運輸政策嘅脈搏，反而不時需要直屬局長出手為佢哋「補鑊」，相信二人眾望所歸無得留低嘅機會好高。表現中規中矩嘅梁鳳儀同許曉暉則面對同一情況，由於直屬局長陳家強同曾德成至今未有離任嘅風聲，梁許二人能否再坐一會，視乎二人能否喺下屆政府「升級轉型」。

至於政制及內地事務局副局長黃靜文，係醒目女一名，基於僅上任兩年多，又負責處理敏感嘅政制發展議題，所以較難以預料。其實呢個政府黐親埋去都無好結果，要留人，都要人肯留低至得架。