中環出更：自詡郵輪專家 陳永棋教坐中型船
意大利巨型郵輪「協和號」日前觸礁翻側，差啲重演鐵達尼號悲劇。卓妮尋日喺沙田馬場見到全國政協常委陳永棋，佢自詡係郵輪專家，佢教大家要揀搭中型郵輪，而佢亦唔會揀意大利船搭。
尋日棋哥現身馬場，為佢同太太隻愛駒「精密紡」打氣，可惜跑得梗頸二，不過都攞走近十五萬獎金。佢話自己有三十年坐郵輪嘅經驗，搭過不下三十架郵輪，可以稱得上係郵輪專家。
棋哥話，今次出事嘅「協和號」級數只屬一般，佢搭過意大利郵輪，覺得人太多太擠迫，無論喺船身裝嵌、餐飲同船員質素方面都唔好，奉勸大家最好搭中型船。而船長同船員，棋哥就話最好揀英國、德國同北歐嘅水手，質素會較勝一籌。
其實棋哥下周六又會上船，佢會同太太飛杜拜散心，年廿九喺當地上郵輪，喺海上過埋農曆新年，坐足十五日先返香港，真係寫意。咁都未夠，佢仲打算五月坐一艘只可容納一百人嘅探險船，由北海道去俄羅斯遊十二日，期間會經過堪察加半島、庫頁島、千島群島，順便睇埋全球最大海洋鳥類信天翁。不過現階段仲係得個諗字，因為棋哥仲未氹得掂太太去喎！
王守業夫人赴美過農曆年
大新銀行主席王守業嘅夫人就話，依家航海技術咁先進，有雷達又有導航系統，隻船出事，船長絕對有責任。就到農曆新年，王夫人話唔使湊孫，因為孫仔跟爸爸媽媽去滑雪，佢就同一班老友飛去美國西岸，暢聚友誼。卓妮仲見到富豪趙世光千金趙式和及丈夫李承康（Dominic），有坐郵輪經驗嘅Dominic話唔怕再坐，事關坐飛機坐車都會有危險，邊擔心得咁多呀！
卓妮