雙非、雙非，又係叫人心煩意亂嘅「雙非」……小一統一派位尋日交表，做家長嘅梗係盼望仔女可以入到心儀學校，可惜唔係人人都咁好彩，尤其喺跨境學童最集中嘅北區、屯門同元朗，唔少家長擔心雙非兒童搶走學位，紛紛要求人大釋法，一了百了解決問題。
近年港人聽到「雙非」兩個字，頭都大埋。每年有幾萬名內地孕婦來港分娩，而且數字仲不斷上升，日後分分鐘有數以十萬計雙非嘅「港產小同胞」回流，同本地兒童爭奪教育、醫療、房屋、就業及社會福利，唔爭崩頭至奇。雙非兒童「爭完床位爭學位，爭完學位爭職位」，話港人唔驚就假。
係人都知，內地孕婦爭相來港分娩產生嘅雙非問題，源於終審法院二○○一年莊豐源案裁決，內地人在港所生子女擁有居港權。雖然港府多年來推出多項行政措施，但不過係修修補補，頭痛醫頭，腳痛醫腳，根本止唔到咳。
要標本兼治唔係無計，只要透過人大釋法，釐清《基本法》有關居港權嘅條文，問題可迎刃而解。弊在港府優柔寡斷，瞻前顧後，唔敢面對現實，扮晒鴕鳥，釋法連提都唔敢提。
查實，人大釋法到底係咪洪水猛獸，可唔可行，法律專家最有發言權。呢，資深大律師、香港基本法委員會委員莫樹聯從法律角度探討釋法嘅可行性，話到明問題完全可以一勞永逸解決，而且並唔複雜。
佢話吖，莊豐源案判決嘅根據係《基本法》規定「在香港出生的中國公民」有居港權，對佢哋父母身份並無規定。原來喺一九九六年，當時特區籌委會已經決定，《基本法》所規定「在香港出生的中國公民」係父母雙方或一方定居香港期間所生子女。而人大常委會一九九九年處理另一宗居港權案時，已透過釋法確認有關決定，仲話到明，香港法院引用《基本法》有關條款時「應以本解釋為準」添。
簡單啲講，解鈴還須繫鈴人，唔使港府出面要求，亦毋須人大常委會主動提出，本港終審庭已有足夠理據提請人大釋法。透過九九年釋法嘅法律效力，唔止可望解決雙非嬰兒居港權問題，外傭居港權爭拗亦迎刃而解，可謂一舉兩得。
正所謂，有心唔怕遲，咪話功夫茶唔提醒當局，家陣高人指點迷津，又見柳暗花明，如果繼續詐傻扮懵，釋法玩拖字訣，雙非危機隨時總爆發，到時中央政府、港府同市民三輸，煲呔曾就係不可饒恕嘅歷史罪人！