政情：阿Paul唔買D＆G另有原因
尖沙咀廣東道名店DOLCE ＆ GABBANA禁攝風波鬧到滿城風雨，原來立法會議員謝偉俊（Paul）都有到該店門前參加萬人影相活動，佢話以前都有幫襯開該品牌，但自從幾年前身材開始走樣之後，就冇再去入貨喇。D＆G設計頗為新潮，剪裁貼身，阿Paul唔幫襯，估計都係唔想自暴其短啫。
阿Paul仲話，D＆G貨品售價都唔平，自從佢由律師轉為多做議員工作後，就冇咁多錢裝身喎，真係識講笑。不過，日前喺立法會遇見佢時，見佢戴住頂毛臣臣嘅帽，當日天氣唔算好凍，但佢入到室內都唔願除低頂帽，足以證明佢幾咁貪靚。佢話，頂帽係購自西伯利亞皮草公司，係養殖皮草而非野生皮草，符合環保原則喎。