政情：李澤楷鄧蓮如飯局密斟
港英年代前行政局首席議員鄧蓮如（Lydia）勳爵，雖然九五年退休返英國定居，但基於丈夫唐明治仲喺香港做緊資深大律師，所以佢一直喺英國同香港兩邊走，每逢返港都會出席活動，或同好朋友敍吓舊。咁啱前晚就有人見Lydia偕丈夫，同電盈主席李澤楷（小小超）及一班朋友喺中環歌賦街一間餐廳食晚飯。
當晚見小小超同Lydia相當熟落，成餐飯雞啄唔斷，好多嘢傾，搞到其他人好似搭枱咁。當大家晚飯後準備走人之際，小小超就好有風度咁護送Lydia同唐明治上車離開。
不過，小小超可能意猶未盡，喺Lydia臨上車前，仲拉住對方密密斟，之後大家先至開心揮手講再見。雖然佢哋好好傾，但傾緊啲乜有趣嘢，就要問吓佢哋先至知喇。