政情：人民力量擬踩場 抗議壹傳媒
稱喺台灣畀人民力量立法會議員黃毓民打傷嘅民主黨中常委馮煒光尋日返港，對於有網民質疑佢扮嘢「插水」，同埋刻意調低相片光暗度詐傷，馮煒光喺機場信誓旦旦話自己真係畀毓民打，至於網上流傳嘅「插水」片段，純粹係佢想諷刺人民力量啲義工成日「插水」冤枉他人喎。
人民力量尋日繼續質疑馮煒光講大話，主席劉嘉鴻更計劃到壹傳媒位於將軍澳嘅總部示威，抗議《蘋果日報》尋日頭版報道唔公平，寫到件事淨係佢哋唔啱咁。佢哋更喺晚上發表嚴正聲明，重申黃毓民並冇毆打馮煒光，有關指控全屬捏造，更指《蘋果》有違傳媒道德，對其報道手法感到深痛惡絕。
《蘋果》頭版標題衰錯「陋」
講開《蘋果》呢篇頭版報道，早版標題《醜陋的香港政客》竟然寫錯字，寫咗做《醜「陃」的香港政客》，唔見咗個「L」，到其後改版先至改番啱。我哋問咗幾位文字專家，佢哋全部都異口同聲話冇聽過呢個「陃」字，又話唔明白頭版頭條標題咁重要，點解連揀字咁簡單都可以揀錯，真正出醜嘅其實係《蘋果》。次文化堂社長彭志銘仲話今次錯得咁離譜，《蘋果》相關版面嘅校對、編輯等人全部都應該問責。