政情：葉劉彈林D9冇政治智慧
新民黨立法會議員葉劉淑儀尋日出席一個婦女組織嘅青年領袖培訓活動時，提到做領袖要有政治技巧，講嘢好重要，可惜好多官員成日講錯嘢，自己製造問題。聽到葉太咁講，起初仲以為佢為暗寸經常講錯嘢嘅特首參選人唐英年啦，但聽落先至發現原來佢係講緊政務司司長林瑞麟（林D9），仲話林D9完全冇政治智慧喎。
葉太話，林D9早前指香港出生率低，內地中產家庭來港產子，可以為香港人口補充新血。曾任保安局局長嘅葉太，就對林D9呢番說話好勞氣，話政府點樣篩選邊啲係中產？同埋又唔知人哋係咪來香港定居，點樣控制人數都唔知，結果搞到啲人要聲討林D9。葉太仲愈講愈勞氣話：「你話咁樣有冇政治智慧先？係完全冇囉！」