政情：煲呔曾市井教壞細路
任期尚有五個半月就要執包袱嘅煲呔曾，到依家仍然死剩把口，大言不慚，無為自己嘅劣績有一絲悔意。佢前日喺添馬艦新政府總部擺入伙酒期間，涼薄到攞剛病愈嘅教育局局長孫公孫明揚嚟講笑，佢話唔好意思孫公被「祭旗」染上退伍軍人症桿菌。實情「祭旗」一詞係黑社會背語，次文化堂社長彭志銘就鬧爆攬住爵士名銜唔放嘅煲呔曾，其實只係一位教壞細路嘅市井之徒。
次文化達人解構「祭旗」
我哋就「祭旗」一詞請教彭志銘，原來呢個詞語確有一段故。話說以前軍隊出征打仗前要拜天地，自不然會宰殺牲畜，令生靈塗炭，故此啲人就將呢個儀式稱為「祭旗」。呢個名詞輾轉流落到清朝，反清復明嘅天地會，就喺入會儀式中吟唱《祭旗令》，事關儀式中，會擺放一個插住五色令旗嘅斗。正因為天地會係地下組織，佢哋唔少習俗都成為黑社會習俗，「祭旗」一詞亦成為黑社會背語。
彭志銘心水好清話，其實煲呔曾唔係第一次使用黑社會背語，好似立法會搬入新大樓後第一次答問大會，煲呔曾毫無先兆下喪鬧人民力量議員黃毓民係「爛仔」，又話立法會唔係「黑社會」地方。彭志銘話，以前啲人唔會自稱係黑社會，只會被叫做爛仔，所以鬧人爛仔同鬧人係黑社會無分別，都係黑社會背語。
至於早前煲呔曾喺立法會舊大樓講「狗噏」，彭志銘話呢個的確唔係黑社會背語，只係一個粗鄙、唔適宜喺立法會講嘅粗口諧音，但煲呔曾都竟然講出口，事後立法會秘書又扯貓尾更改會議紀錄，實在無恥教壞細路。
數數吓，煲呔曾嘅失言都幾多，彭志銘相信，咁只係證明自詡為爵士嘅煲呔曾，骨子裏同一個草根嘅市井之徒冇分別。彭志銘仲好慶咁鬧，○七年有家品店出咗一啲寫有類似三合會社團字樣嘅潮流T恤，警方隨即上門拉人，今次煲呔曾又再講黑社會背語，點解警方又唔做嘢上禮賓府拉人呢？一旦日後市民講「祭旗」，又使唔使畀人拉呢？