中環出更：拉頭馬慶功 鄭錦鐘飲「金鐘」
頻頻拉頭馬嘅保良局副主席鄭錦鐘（Eric），踏入新一年，旺氣更勁，事關佢愛駒「享耆成」，上周三喺新年後首場夜賽就報捷，連獎金及私人落注彩金，穩袋六十幾萬元。財神送錢，梗係要切乳豬高興吓啦！
筵開兩席歎秘製乳豬
Eric日前喺尖沙咀君怡酒店中菜廳「君怡閣」筵開兩圍，宴請好友食晏，鄭太都有撐場。咁高興嘅日子，Eric出動多支私伙法國佳釀，包括1996 Dom Perignon Rose及1996 Chateau Angelus（金鐘莊），兩支都係評分極高嘅美酒，配上一味「南寧燒乳豬」，夠晒創意。呢味燒乳豬製法好講究，師傅將秘製香飯釀入乳豬內，再燒成金黃色，入口皮脆肉嫩，香口惹味。
運勢咁旺，Eric近日就同幾個來自深水埗賽馬團體嘅好友合資三百萬港元，由法國購入一匹新馬，預計日內就會抵港，但馬名就仲諗緊。聽聞呢匹馬戰績彪炳，Eric寄望甚殷，卓妮都預祝佢龍年馬到功成。
