中環出更：田少寫揮春 姿勢100分
仲有一星期就到「龍」曆新年，大街小巷已出現辦年貨嘅人潮，過年氣氛漸濃。尋日中午沙田乙明邨更熱鬧滾滾，原來香港青年協會擺咗三十圍盆菜宴益街坊，提早共享團年飯。旅發局主席田北俊等政界名人齊現身獻技寫揮春、搓湯圓，可惜啲揮春水準唔係好得，靠誠意搭夠。
尋日寫揮春嘅除咗田少外，仲有勞工及福利局局長張建宗、沙田區議員葛珮帆等人。卓妮見田少運筆流暢，有紋有路，一睇就知佢學過師。
田少笑稱，佢確係跟一位錢老師學過書法，每堂四十五分鐘，一堂學費要六百蚊咁多，但佢淨係學咗兩堂。難怪尋日佢揮筆嘅姿勢一流，但係實際作品就……大家都係睇相自行判斷啦。
張建宗都寫咗張「大吉大利」揮春，佢都幾講究筆法，但字形就唔算得靚，唔知有冇街坊攞返屋企貼門口呢？相比之下，葛珮帆寫嘅福字就圓潤得多，襯晒家肥屋潤好意頭。活動完咗後，卓妮見田少急急腳走人，原來佢趕去大圍派「福」字揮春，細心一看，個福字竟然係佢嘅墨寶，但就同佢之前喺團年飯寫嗰張有啲出入。
青協220圍盆菜益街坊
今次係青協首次舉辦「鄰舍團年飯」，唔只乙明邨有活動，青協轄下二十一間青年空間亦同步舉辦，合共筵開逾二百二十圍，全部由一位神秘善長贊助，招呼超過二千名街坊齊過年。
卓妮