官地斬百樹 四部門鬥卸

粉嶺萬屋邊村民阿葵（化名）指出，村口一帶有逾百棵樹木屹立多年，不料早前竟在一夜間全部被毀，「居然喺一晚就冇晒咁多棵樹，真係好得人驚，都唔知係咪有人想霸笪地！」由於被斬樹木種於官地，阿葵遂與一眾村民向北區民政處及地政總署了解，未料兩部門均指「唔關佢哋事」。幾經交涉後，漁護署才派員到場調查斬樹事件。阿葵坦言對官地竟淪為無王管地帶大感諷刺，「唔投訴都唔知原來政府係咁做嘢，有事發生先搵人去查下，唔係就完全唔管唔理，唔怪得咁多人霸官地做犯法嘢啦！」

發展局發言人表示，由於涉事官地屬「未租出土地」，故屬無人管理範圍。被問及全港「未租出土地」數量時，發言人則指未有實際統計數字，僅稱相關土地「周圍都係」。

漁護署發言人則稱，接獲市民舉報後已派員了解，證實上址有七棵樹木被破壞，正跟進事件及聯絡相關部門協助調查，但強調有關樹木的日常管理非由該署負責。不過，就記者現場所見，被斬樹木最少有逾百棵，與漁護署所指有明顯出入。

變相助長非法行為

「官地無王管好多年前已經係咁，咁耐都未解決，所以先有咁多人霸嚟做犯法嘢，好似無牌骨灰龕就係其中嘅表表者！」立法會民政事務委員會委員陳淑莊認為，地政總署對「未租出土地」不作管理，變相助長不法之徒於政府土地上進行非法行為，「我知佢哋（地政總署）人手有限，冇人叫佢哋要擺個人喺度睇住笪空地，但定期去巡、教育同宣傳呢啲點都要做，唔係一句話唔關佢（署方）事就解決到！」

長春社高級公共事務經理李少文則直指發展局的回應匪夷所思，「官地上面咁多棵樹畀人斬咗都可以話唔關佢哋事，咁樹木辦同地政總署做緊咩？」李又批評事件充分反映樹木辦「管樹不力」，「冇理由話嗰度未租出去完全唔理唔管。」

記者 嚴朗婷