經過八年抗戰，香港人透過五十萬人浩浩蕩蕩上街遊行而令到董建華腳痛落台。之後換咗一個叫做曾蔭權嘅物體，春去秋來七年嘞，香港人嘅生活質素有冇改善呢？不如咁講啦，七年之癢變成七年之痛，痛到死得人嗰隻。
思匯政策研究所發表報告指出，曾蔭權過去七年在任期間，處理空氣污染問題不合格，尤其路面排放影響公眾健康，對未來經濟發展造成威脅。最得人驚嘅係，舊年係香港路邊空氣污染最嚴重嘅一年，二氧化氮水平不斷上升，估計二○○五年至二○一一年期間，有七千二百四十人因此提早死亡，額外醫療開支超過十五億元。
喂，七年之間害到超過七千人提早死亡，平均一年冇咗一千條寶貴人命，你話係咪七年之痛吖？嗱，空氣污染死得人並非穿鑿附會，醫療專家講得清楚明白，吸入過多廢氣可導致肺功能惡化以及呼吸道症狀，並且可能增加罹患肺癌同非惡性肺疾病嘅死亡率。
香港空氣質素之差，簡直可以咁樣形容，擘大口食西北風都會中毒。大家應該都聽過北京經常烏天黑地，事關懸浮粒子多到爆燈。如果香港同北京比較，情況又係點呢？根據中國統計年鑑顯示，香港二○一○年嘅二氧化氮濃度位列全國第二，空氣污染差過北京，估計二○一一年情況更壞。
所以話啫，環保團體將煲呔曾列作「氣候逃犯」係完全有道理㗎，事關呢一個所謂大當家由始至終拖拖拉拉，冇為改善空氣質素盡過力。曾蔭權講係咁講，會於二○一一年更新空氣質素指標，可惜吖，事實係空口講白話。立法會議員踢爆，政府根本冇更新空氣質素指標嘅時間表，事關議員舊年十月曾經同環境局局長邱騰華會面，局長大人完全冇交代何時落實新指標。
即係咁，現行空氣質素指標非常落後，人哋世界衞生組織二十年來不斷修訂，訂出嘅標準愈來愈嚴格，香港就停留喺上世紀八十年代。落後大勢到如此田地，本地官僚可以話係史上最不思進取嘅超級慢動作爬蟲類動物。
七年超過七千人因為空氣污染而提早死亡，呢一個數字如果化作一齣恐怖電影，情節一定嚇到觀眾心膽俱裂。咁都未算，你知香港嘅骨灰龕位係幾咁渴市㗎啦，大量英年早逝嘅幽靈變成無處安息嘅冤魂，又係另一齣恐怖電影。
唔好怪功夫茶黑心，港府有咁多病壞高官，隨時都會淪為空氣污染嘅受害者。好心曾蔭權為人為己，唔好再做氣候逃犯禍港殃民，盡快認真改善空氣質素，唔好造成官場提早死亡現象吖嘛！