政情：許副掃社企曲奇拜年
農曆新年將至，又要苦惱買禮物去拜年，向來力撐社會企業嘅民政事務局副局長許曉暉（Florence），就繼續用社企產品做賀年禮物，今年佢就睇中東華三院社企iBakery出品嘅「大福曲奇罐」禮盒。
「大福曲奇罐」由殘疾僱員人手製造，入面嘅曲奇包含五種口味，部分曲奇餅仲雕刻咗個「福」字添，寓意「福樂滿門」，相當好意頭。
Florence話，近年不時購買社企出品作送禮之用，主要係予人感覺較有心思，唔會咁易同市面出售嘅禮物咁一式一樣，好似佢今年送禮嘅曲奇罐咁，包裝好精美，罐面同紙袋都印有多條橙黃色嘅金魚，「年年有魚」夠晒意頭。