政情：鼠王芬過台灣學拆彈
台灣總統大選如箭在弦，宣傳方式推陳出新，香港各大政黨同政團都紛紛組團赴台偷師，其中曾發表「選民懲罰論」嘅西九新動力主席梁美芬（鼠王芬），就啱啱去完返嚟，原來佢想考察當地候選人如何拆解敵營嘅輿論攻擊。
莫非佢已有心理準備會喺九月立法會選戰再畀人惡搞，所以學定拆彈？
鼠王芬今次率領十多名西九新動力成員赴台，明眼人一睇就知係為立法會選舉做好準備。原本佢諗住考察當地候選人如何拆解敵營嘅輿論攻擊，但點知發現當地嘅競選造勢活動都好少用粗鄙行徑或言語表達喎。
講開赴台取經偷師，鼠王芬喺前年十一月都有率團赴台睇「五都選戰」，當時亦有拜會多個台灣政界人士，其中較深刻係同現任台北市長郝龍斌會面。佢話，當時郝龍斌逐一同團員拍照留念，而且喺兩小時後將雙方合照送到各人下榻嘅酒店作為留念，其效率之高真係令人難忘。