中環出更：許威望拉頭馬歎吉品鮑慶功
大亞日本食品老闆許威望嘅愛駒「稻庭烏冬」，前晚以爆冷姿態跑出，將近三十萬獎金袋袋平安，佢即時笑到四萬咁口，仲開香檳慶祝添。原來賽事前幾日，練馬師已經話畀佢知，匹馬好有機會跑出，所以佢一早已經訂好位同一班老友慶祝，仲講起要食溏心鮑魚。
愛啖啖肉有質感
許威望作為全港最大日本食品進口商兼經營日本餐廳，相信慶祝時一定唔少得歎番隻日本溏心吉品鮑。佢自言好鍾意食吉品鮑，鍾意大隻啖啖肉又有質感。不過，吉品鮑成熟期較慢，年前日本大地震又令到供港嘅吉品鮑缺貨，所以佢都食少咗，轉而食其他體形較小嘅鮑魚。
至於好多港人都擔心日本食品有輻射，但許威望相信只要政府把關得力，食品進口前通過安全測試，自然食得放心。投資方面，許威望話自己只會購入優質嘅豪宅同舖位，因為冇咁易跌價喎；佢仲話，經濟有適度調整係好事，展望今年業績平穩。
卓妮