中環出更：菁英新丁想夾份做馬主
匯聚城中才俊嘅香港菁英會，新人輩出，新一批會員上月誕生，新丁們老友到極，日前相約去中環國金軒食晏，提早賀新春。今次聚會由出爐新丁、玩具公司太子爺潘偉業（Albert）做搞手，有十多位新成員撐場，包括「莎莎女婿」陳振邦（Davis）、「化妝品王子」陳錫銘（Jackie）、金融才子蔡尚圻、汽車電池公司太子女何稼珉等。
Davis話，今屆三十五位同學好齊心，不時相約食飯、踢波或唱歌。無他嘅，今期學員唔少係八十後才俊，平均年齡只有廿九歲，計落係歷屆最年輕一班。Davis外父、莎莎主席郭少明近年馬運亨通，旗下愛駒連番報捷，聽聞做女婿嘅Davis貼馬嘅眼光都有番咁上下，不時帶挈唔少菁英同學贏大錢。
連名都改埋
正因為咁好運，同屆菁英人就提議夾份養番匹團體馬，仲初步連馬名都改埋，有人話不如叫「菁英十二」、「菁英之星」或「菁菁之英」等，講到真嘅一樣，若然成事，相信以後馬場會增添好多熱鬧氣氛。
Davis好雀躍話，呢個構思有得諗，事關佢個人名下未有馬匹，但當務之急都係專心迎接「小龍B」出世，要學定湊仔喎！
至於留學英國嘅Albert，原來係足球發燒友，佢話有意組織一隊足球隊，不時邀約其他團體踢吓友誼波，實行以波會友咁話。
卓妮