好多人都誤會添馬艦新政府總部命名為「門常開」嘅意思，以為大門永遠為民眾開。其實大錯特錯，門常開從來冇講明為邊個開。
門常開嘅服務對象主要有幾類賓客，第一類係達官貴人，第二類係鼠摸狗盜，第三類係退伍軍人症桿菌。至於記者咯喎，鬼叫你又唔係菌，又唔係賊，又唔係高高在上嘅官老爺咩！
呢嗱嗱嗱，門常開將記者拒諸門外再有劣行。件事係咁嘅，總部西翼三號入口忽然之間「落閘」，保安人員針對性禁止記者內進，必須繞路十分鐘改由東翼四號閘進入。每事問嘅記者當然要問個清楚明白啦，點解無端端落閘呀？勢估唔到，落閘之後居然變本加厲「放狗」，有保安人員態度惡劣咁發難反問：「你黑社會嚟o架？」當然啦，惡保安冇嘢叻，除咗開口亂吠就係伸手遮擋鏡頭。
講到遮擋鏡頭，大家都知尖沙咀名店D&G最近犯眾憎啦，雖然冇落閘，不過都係放狗，保安人員兇神惡煞禁止路人喺公眾地方影相。呢一件事激嬲全人類，星期日數以千計市民集體走去「攝影起義」，嚇到D&G唔敢再放狗，反而落閘龜縮。名店點解會出現「禁攝霸權」？政府教壞細路吖嘛，門常開既然咁惡死，D&G咪有樣學樣囉。
門常開食蕉保安惡劣態度招呼記者當然唔係第一次，遮擋鏡頭已經算斯文，有時仲會肢體接觸，程度可以形容為粗暴。
立法會秘書長吳文華曾經嘗試解畫，話種種不愉快情況全由溝通誤會引致。吳小姐話喎，保安人員可能不理解傳媒同立法會嘅合作關係，先至會引起誤會。呢一番說話係舊年十月講嘅，依家事隔三個月嘞，溝通有冇改善呢？誤會有冇消失呢？
真係難怪林瑞麟被稱為「人肉錄音機」，吳文華三個月前賴天賴地賴溝通，呢一位政務司司長三個月後再講一次。對於記者不滿採訪受阻，林公公毫無新意咁話，相信行政署與保安部門溝通出問題，行政署已就事件表示歉意。
咦，咪住先，何解食蕉保安問記者「你黑社會嚟o架」？又係教壞細路，曾蔭權都質疑過立法會議員係黑社會爛仔啦，守門口嗰班好易學壞o架咋！
計功夫茶話齋，林公公如果真係刻意阻礙記者採訪自由，從而箝制新聞自由，咪老實講囉，冇必要講一套做一套吖。之不過咁，坦白未必從寬，D&G事件有眼你睇，所有霸權行為都犯眾憎，繼而就係浩浩蕩蕩嘅聲討運動。如果曾氏霸權政府真係赤裸裸箝制新聞自由，功夫茶擔保，包圍門常開嘅示威者肯定唔止數以千計！