添馬艦新政府總部大樓惡菌繼續湧現，逾五十億打造「門常開，放毒來」的大樓，睇怕係夕陽政府才可以如此大手筆營建此座「毒廈」。老朽相信「門常開」必定成為香港建築工程嘅奇迹，而教育局局長孫公今趟真可揚名矣！
點解咁講？嗱，港大微生物學系教授袁國勇話，起初無法確定孫公肺炎的致病源，最後利用細菌基因測試才成功確診，驗出退伍軍人症桿菌血清一型，繼而揭發新政府總部建築群處處藏毒菌。
孫公病前因曾到廣州一動物園及酒店住宿，與很多退伍軍人症患者的旅遊經歷相似。原本懷疑孫公感染嘅病毒由外地傳入，幸好利用病人嘅細菌作基因測試，才揭發新政府總部大樓是病毒根源！
孫公捨身試菌立咗大功，一來還內地酒店一個清白，二來揭發退伍軍人症桿菌源頭係自己地方。看來，孫公雖有心為香港教育奮鬥到最後一刻，其工作熱誠及敬業樂業之精神，足以感天動地泣鬼神。不過，香港教育改革失敗，教育政策畀行家彈到樹葉都落。孫公以殘軀努力打拚也拚不出甚麼名堂；如今，陰差陽錯，孫公大名與「門常開」血脈相連、關係緊扣，冇佢，啲菌都唔知仲會匿藏幾耐！惡菌凝聚，爆開仲大鑊！
佛教有「捨身飼虎」故事，今孫公「捨身試菌」，一樣深含悲憫，其偉大情懷可謂不廢江河萬古流！呢個故事亦教訓我哋，只要一息尚存，點都會有貢獻o架！