中環出更：梁青華出兩匹馬都要輸
尋晚跑馬地快活谷夜賽有場精彩賽事，兩匹同馬主團體馬「無敵福星」及「無敵駿駒」同場演出，本來自己鬥自己互相激勵都係一件好事，起碼拉頭馬嘅機會倍增，可惜出兩匹馬都唔夠人哋鬥，最後畀「稻庭烏冬」爆冷跑出，好夢成空。
兩匹團體馬嘅馬主好多都係名人，包括喜運佳常務董事梁青華（華哥）、醫生韋基豪、代理瑞士名錶寶齊萊嘅名譽主席及行政總裁曾國雄等。開跑前，一班馬主意氣風發咁等拉頭馬，有馬主仲講笑咁話，話唔埋兩匹愛駒會攞雙冠軍添，愈講愈起勁，點知最後兩匹馬三甲不入。
今年生意要謹慎啲
講到鐘錶業生意，華哥話去年營業額的確好理想，有雙位數字增長，但今年就要謹慎啲，因為歐債危機仲未解決。佢坦言，香港鐘錶業嘅市道都仲維持得到，但係內地銷情就差啲，最近生意大跌三成，情況唔樂觀喎。