中環出更：醫專會千人盆菜宴暖笠笠
天氣凍，食盆菜加熱都係一個好選擇。上周六夜晚，旺角警察遊樂會舉行千人盆菜宴，原來係香港醫療專業人士協會（下稱醫專會）主辦，請長者及新移民開餐睇騷兼且有利是派，現場氣氛暖笠笠。
醫專會主席江明熙（Bernard）話，協會成立以來，年年都喺港九新界唔同地方舉行盆菜宴，今年已係第四屆，愈搞愈開心，規模亦愈嚟愈大。當晚唔少醫學界翹楚齊撐場，包括行政會議成員梁智鴻、公共醫療醫生協會會長蘇潔瑩、牙醫學會會長梁世民、立法會議員潘佩璆及醫學會前會長謝鴻興等。
梁智鴻話，盆菜雖然係新界圍村人嘅傳統習俗，但係近年愈嚟愈流行，去年佢食過一次齋盆菜，好好味，令佢念念不忘。當晚佢仲叫大家唔好客氣，落力摷亂佢，事關盆菜文化寓意時來運轉咁話。