中環出更：指揮家林敬基 追求精神富足
去年六月獲得美國曼菲斯交響樂團指揮大賽冠軍嘅港產音樂家林敬基（Ken），最近來港為電台聖誕音樂節目做指揮，可能大家對佢認識不深，其實佢係立法會議員方剛嘅姨甥。卓妮細聽阿Ken嘅音樂路，原來佢曾經做過十年律師，期間一直做業餘指揮，直到有日突然放棄高薪厚職轉型做全職指揮，先至發現自己原來有潛力食呢行飯。
阿Ken現任美國辛辛那提交響樂團助理指揮及辛辛那提青年管弦樂團指揮，亦係室內合唱團「香港和聲」音樂總監及「香港室樂團」首席指揮，演出經驗豐富。阿Ken由細到大都好鍾意音樂，最愛古典音樂，事關可以洗滌心靈。佢坦言，玩音樂後對生命有另一種睇法，唔再只往錢看，唔再隨波逐流，精神上得到富足，而且音樂本身充滿說服力同影響力。
姨丈方剛成形象指導
對於香港培育指揮家嘅前景，阿Ken坦言，學指揮與學小提琴或結他好唔同，唔係話一個人、一種樂器就可以學得到，要有整個樂團去訓練，而香港就太少藝術空間，又缺乏有勢力嘅社會人士去推動，所以好難培養出優秀指揮家。不過，佢補充話，香港唔係冇藝術文化，只係港人太忙，假期太少，冇時間去欣賞音樂啫。
講到姨丈方剛，阿Ken話姨丈都好支持佢做音樂，但姨丈始終唔係音樂人，所以轉做佢嘅形象指導，仲介紹咗個專業裁縫畀佢，度身訂造表演服裝，好似早前聖誕節返港表演着嘅中山裝，就係姨丈介紹佢去做嘅，佢仲做多咗套「踢死兔」（Tuxedo）返美國備用添！