政情：劇集金句肥亨唔同意
播到尾段喺內地被禁播嘅電視劇《天與地》街知巷聞，不過中策主席馬時亨就唔同意話香港正在死亡呢句金句，反而覺得喺睇淡情緒下，可能係市況見底嘅兆頭。
馬時亨尋日出席青年獎勵計劃擔任頒獎嘉賓，喺演講詞末段引用《天與地》嘅插曲《年少多好》歌詞，不過對於呢個城市正步向死亡（The city is dying）呢句對白，馬時亨就唔同意。佢話早於主權回歸嘅時候，就有外國言論話香港已死，但係事實證明呢個論調係錯嘅，香港咁多年來雖有起伏但仍然欣欣向榮。反而，每當有呢種睇淡嘅言論出現，可能反映市況已經見底。
馬時亨話佢身為中策嘅主席，過去一年搵唔到合適嘅投資目標，然而市場經過一番調整，好多投資項目嘅估值都較為合理，故此今年嘅市況應比去年為佳。佢認為因為通脹，資源股有追捧價值，至於房地產，尤其是涉內地嘅，馬時亨就呼籲大家要小心嘞。