政情：陳智思係「第三者」？
近日我哋收到風，話香港社會服務聯會副主席陳智思（Bernard）無喇喇發電郵，恭賀班特首選委順利當選。咁啱得咁蹺，又有傳北京喺聖誕節前後向一班新選委同建制派人士收風，問佢哋覺得特首參選人梁振英（CY）同唐英年當選嘅話有乜好處同壞處，仲問大家有冇其他特首人選添。嘩！唔通Bernard就係「第三者」，要發電郵畀選委拉票？
北京喺聖誕節前後向一眾選委同建制派收風，據聞問咗大家三個問題，第一條係問：CY當選嘅話有乜好處同壞處、第二條問：係唐唐當選嘅話又有乜好處同壞處、而第三條竟然係問大家有冇其他心水特首人選。唔知北京係咪想喺「雙英」以外，打造多個人選畀啲選委多啲選擇呢？
咁啱我哋又收到風，Bernard最近發咗電郵畀選委恭賀佢哋當選，莫非佢係向選委拉票？我哋都搵過Bernard，身兼港區人大代表嘅佢解釋，係因為要定期向港區人大嘅選民匯報工作報告先發出呢個電郵，而新當選嘅選委正正就係港區人大嘅選民喎。咁即係話，Bernard都係拉票，但唔係為咗選特首，而係為咗選人大代表囉！
講開又講，Bernard同CY曾經喺行政會議同嶺南大學校董會共事，所以外界一直有個講法，話佢係「梁營」嘅人，但佢就斷然否認，仲強調話：「如果我係梁營，一早幫咗佢（CY）啦！」之不過Bernard尋日出席一個青年領袖頒獎禮時話，喺佢認識咁多前局長之中，係得前商務及經濟發展局局長馬時亨可以同人溝通得到，又話「作為一個領袖溝通都唔得，係做唔到領袖。」跟住佢仲話，做領袖誠信係好重要，係香港嘅核心價值咁話。
暗寸唐唐句句應
聽完Bernard咁講，唔使畫公仔畫出腸都知佢講乜，事關特首參選人之中，得唐唐做過局長，咁啱唐唐又係成日講錯嘢，溝通能力有目共睹，而且又有「感情缺失」，即係對太太冇誠信，估唔到Bernard句句寸到盡，當然佢就唔認係插唐唐啦。