中環出更：盛智文扮壽星公祝壽
海洋公園同香港迪士尼樂園係競爭對手之餘，仲喺公關手腕上比併，好似尋日迪士尼樂園行政總裁金民豪出嚟公報業績，咁啱海洋公園又搞三十五歲生日派對，主席「扮嘢文」盛智文仲以「壽星公」形象現身搶鏡，又同迪士尼差唔多時間搞，話唔係打對台都冇人信。
賀海洋公園35周年
扮嘢文嘅「壽星公」裝扮入型入格，臉上黐滿晒白色鬚，如果佢唔開聲講英文嘅話，真係完全冇破綻，但尋日一開聲就變咗西洋壽星公囉。扮嘢文事後話，呢個「壽星公」造型搞咗好耐時間，有幾耐呢？總之一早返到海洋公園就開始搞喇。搞咁多工夫，都係希望為海洋公園祝壽喎！
尋日扮嘢文除咗化行妝外，仲為海洋公園嘅業績大玩掩眼法，利用唔同嘅計法將業績計到好過迪士尼，話海洋公園嘅盈利佔收入比率，高過迪士尼一倍，跟住再下一城，話舊年錄得破紀錄嘅七百萬入場人次添。無法啦，迪士尼嘅入場人數追貼海洋公園，盈利又大幅增長，扮嘢文唔玩吓戲法點得呀！