中環出更：龐太卸任保良 憂善款埋數
保良局新一年以「實現千歲願」為主題，為安老服務籌募經費，尋日喺富豪機場酒店舉行開展禮，頭炮活動係「懷舊化妝舞會」。去年經濟唔理想，將於三月底卸任保良局主席嘅龐盧淑燕坦言，經濟對善款數字有直接影響，但慶幸有一班朋友好支持佢，有望卸任時嘅善款能夠保持以往紀錄喎，咁接任嘅現任副主席梁寶珠就唔怕無米炊啦！
笑容滿面嘅龐太尋日化身「開心果」，親手派福袋畀長者，氹得長者們好開心。卓妮見佢每次出席活動，都必着鮮色衣服，佢特別鍾情法國名牌Leonard，顏色搶眼得嚟又唔會誇張，佢話着鮮色衫顯得個人精神啲，心情都開朗啲喎。龐太話落莊後，會返加拿大陪吓年屆八十嘅父母同妹妹，仲會抽時間去旅行，享受一下悠閒生活。
郭羅桂珍等做外婆
講番今次長者活動，原來係出自籌委會主席、莎莎老闆娘郭羅桂珍嘅手筆，佢話上次搞過一個長者catwalk表演，發現原來長者好有活力同創造力，所以今次再接再厲。就快抱孫嘅郭太甜絲絲話，囡囡已經請定陪月員，佢只係負責玩BB喎。
卓妮同場又見到富豪集團太子女羅寶文，佢話其集團已經係第三年同保良局合作。展望今年業務，寶文對本港旅遊業依然樂觀，集團旗下六間酒店位處黃金地段，主要吸內地遊客，未來繼續加強網上宣傳，唔愁冇生意做。