新政府總部自誇「門常開」，但連傳媒採訪都受到諸多掣肘，真係虛有其名。反而立法會新大樓就相對名副其實，事關佢哋徇眾要求，喺農曆年初二開放新大樓對出偌大嘅廣場畀市民入去觀賞煙花，做到真正嘅門常開。不過，立法會新大樓就唔會對外開放，連尊貴嘅議員帶朋友入內都唔得，相信係為免釀成混亂。
立法會新大樓位處添馬艦臨海地段，睇煙花真係一流，難怪早前有議員都想帶團去新大樓睇煙花喇。立法會行政管理委員會尋日傾過呢個問題，最後決定開放立法會正門對出空地畀市民欣賞煙花，當然立法會亦要同警方傾掂人流控制問題啦。
其實賀歲煙花應該人人共享，立法會作為民意代表，今次能夠從善如流，都可算係誠意之舉。反觀一步之隔嘅政府總部，同樣坐擁無敵海景但重門深鎖，外面仲專登整個政治花槽，驚死被人衝擊，煲呔曾呢個管治班子真係好行夾唔送囉。