政情：四太買錶申報示清白
澳門立法會最近以全票數通過「財產公開法案」，法案有望今年上半年內實施，其中作為議員嘅賭王四太梁安琪，一直都表態支持澳門官員將財產公開。四太日前到珠海參加政協會議期間，接受內地傳媒訪問時話，自己所有財產都已公開咗，仲邊講邊展示手上嘅名錶，話連用七萬蚊買隻錶都會向法院申報，但佢就好反對將申報財產嘅細節經傳媒公開出去，所以要訂出清晰嘅公開指引。
四太話，政府官員申報財產好應份，因為可提高政府透明度，避免以公謀私，但站喺議員立場，議員唔會參與政府政策設計，根本冇機會以公謀私喎。佢仲話，如果官員有財產係涉及私隱嘅話，就唔應該公開喇。至於邊啲人員要公開，公開嘅尺度係點，就要由立法會同政府決定，訂立清晰嘅指引，以求公開嘅同時，又可以保護到個人私隱。