政情：經濟動力樁腳聲勢弱
經濟動力一直聲稱有多名地區樁腳，但只聞其聲未見其影。等咗咁耐，佢哋有幾個樁腳尋日終於曝光，首次用動力牌頭到民政事務總署牌照事務處，投訴沙田同東區懷疑有人將住宅單位非法租畀內地旅客同孕婦居住，靜待臨盆之前衝急症室生仔，要求當局監管「非法民宿」咁話。不過，原來佢哋仲未證實到有咁嘅情況。
尋日打正旗號嘅有離島區議員鄺官穩及新界東地區主任劉帶生，仲有只稱為東區區議員嘅周潔冰。劉帶生話，有沙田第一城街坊投訴部分座數有單位租畀內地孕婦待產，仲好有系統，低層單位樓上畀人住、樓下就做食堂。不過，記者同佢一齊去到有關座數低層拍門，暫時證實唔到呢個狀況。
周潔冰亦話東區問題一樣嚴重，重災區響北角、炮台山同維園附近嘅三無大廈，懷疑有人用板間房形式經營「民宿」，擔心影響安全。民政事務總署就回應話，會致力打擊無牌經營旅館活動，接到投訴會響八個工作天內，按情況放蛇及突擊巡查等，農曆新年更會聯同警方展開突擊行動。